یک هیئت بلندپایه از تاجیکستان روز شنبه ۲۴ عقرب وارد کابل شد. این هیئت شامل نمایندگان وزارت خارجه و ادارات امنیتی تاجیکستان است.
براساس گزارش‌ها، قرار است مقام‌های طالبان و تاجیکستان درباره سفارت افغانستان در دوشنبه گفت‌وگو کنند و همچنین روابط سیاسی، اقتصادی و امنیتی میان دو طرف تقویت شود. بررسی پروژه‌های مشترک نیز از دیگر محورهای مذاکرات عنوان شده است.
سفر این هیئت تاجیکستانی در حالی انجام شده که چند روز پیش نیز تعدادی از مقام‌های این کشور به ولایت قندوز سفر کرده و با مسئولان طالبان دیدار کرده بودند. پیش از این، یوسف وفا، والی طالبان در بلخ و از نزدیکان هبت‌الله آخندزاده، رهبر طالبان، به دعوت تاجیکستان به دوشنبه سفر کرده بود و خواستار واگذاری سفارت افغانستان به اداره طالبان شده بود.
در حال حاضر، سفارت افغانستان در دوشنبه تحت کنترل نماینده دولت ساقط شده افغانستان است، اما قنسولگری افغانستان در شهر خاروغ تاجیکستان مستقیماً زیر نظر وزارت خارجه طالبان فعالیت می‌کند. تاجیکستان از جمله کشورهای آسیای میانه است که در چهار سال گذشته کمترین روابط دیپلماتیک را با طالبان داشته است.
