یوسف وفا، والی طالبان در بلخ، در سفر خود به تاجیکستان با رئیس شورای علمای این کشور دیدار و نسخه‌ای از قانون امر به معروف، سخنرانی‌ها و دستورات ملا هبت‌الله آخندزاده، رهبر طالبان را به او هدیه داد.
دفتر والی طالبان اعلام کرد هدف از این هدیه، شناخت بهتر اهداف و مفکوره طالبان توسط علمای تاجیکستان بوده است.
در این دیدار، شماری از علمای برجسته و شیوخ بزرگ تاجیکستان نیز حضور داشتند. یوسف وفا ضمن تأکید بر اینکه افغانستان و تاجیکستان هر دو کشور اسلامی هستند، از علمای تاجیکستان خواست تا برای گسترش روابط دینی و فرهنگی، به افغانستان رفت و آمد داشته باشند.
والی طالبان افزود که همه مسئولان و وزیران اداره طالبان علما و شیوخ هستند و ملا هبت‌الله آخندزاده را «فقیهی خوب و واعظ برجسته عصر» توصیف کرد. او همچنین اشاره کرد که در ولایت بلخ، اوزبیکستان در حال ساخت یک مدرسه دینی بزرگ است و از تاجیکستان خواست تا در ساخت مدارس دینی و مساجد در افغانستان نیز مشارکت داشته باشند.
یوسف وفا روز پنجشنبه، یکم عقرب، وارد تاجیکستان شد و در اولین روز سفر خود به شهر دوشنبه، با خورشید عطازاده، فرمانده مرزها، و سید مومن ستاراویچ، وزیر استخبارات تاجیکستان نیز دیدار کرد.
با وجود اینکه تاجیکستان روابط دیپلماتیک رسمی با طالبان ندارد، این کشور میزبان برخی از چهره‌های مخالف طالبان پس از سقوط نظام جمهوری افغانستان بوده است. در حال حاضر، سفارت افغانستان در دوشنبه تحت کنترل نماینده دولت ساقط شده افغانستان است، اما قنسولگری افغانستان در خاروغ مستقیماً تحت حمایت و نظارت وزارت خارجه طالبان فعالیت می‌کند.
