رئیس عمومی کمیته بین‌المللی صلیب سرخ از چند روز به اینسو در سفر به افغانستان به سر می‌برد و با شماری از مقام‌های اداره طالبان دیدار کرده است.
وزارت خارجه طالبان امروز دوشنبه در خبرنامه‌ای گفته است که امیرخان متقی، سرپرست این وزارت با پییر کرینبول، رئیس عمومی کمیته بین‌المللی صلیب سرخ در کابل دیدار و گفتگو کرده است.
بر بنیاد این خبرنامه، سرپرست وزارت خارجه اداره طالبان در این دیدار خواستار همکاری کمیته بین‌المللی صلیب سرخ درباره سرنوشت زندانیان افغان در خارج از افغانستان شده است.
هرچند کمیته بین‌المللی صلیب سرخ در این باره تاکنون چیزی نگفته است، اما وزارت خارجه طالبان به نقل از رئیس کمیته بین‌المللی صلیب سرخ نگاشته است که «محدودیت دسترسی صلیب سرخ به زندان‌ها از سوی شماری از کشور‌ها، مانع تلاش‌های بشردوستانه برای یافتن افغان‌های زندانی و اطلاع دادن به خانواده‌هایشان شده است.»
